百病纏身

好似自從中學畢業之後,身體都未好過.唔係鼻敏感引致大傷風,就係肚痾.基本上好似係連住.總之就係唔傷風流鼻水果日就一定會肚痛肚痾.

平時每一日基本上除咗食飯,就一定係要食傷風藥.只要有一日唔食傷風藥呢,亦都代表住果一兩日之內就實會大傷風,從不例外.

其實平時自己著衫都已經好小心,寧帶多件衫,都唔想因為凍親搞到大傷風.但最唔明嘅係,夏天都冇開冷氣,都係一樣會大傷風,我都好唔明.究竟係咪身體上已經習慣有藥控制住,冇藥就唔掂.有啲似食白粉道友咁,果日冇上電就會口水鼻涕一齊嚟.過份依賴藥物?

出面買藥又係奇怪,其實大部份牌子傷風感冒藥,個有效成份都係類似,只係劑量不一.但唔知點解係要食某一個牌子先可以唔流鼻水,食另一個牌子就算你食晒食排鼻水都係照流.我都好唔明,心理作用定係生理作用呢?

呢一排決定要開始試下盡量戒食西藥,試下飲中藥,希望可以唔駛下下依靠藥物,唔係真係買藥食貴過食飯.