佢叫細佬

佢亦都係四姐弟中其中一員嚟。本來並冇打算湊埋佢返嚟，但係擒日聽同事講話另外一隻都車死埋，唉，我擒日夜晚係廠果到時，聽到貓叫聲，走去睇，見佢就坐係晏晝死埋果隻隔離，係到好慘咁叫，於是乎唯有抱埋佢上嚟啦。因為明顯啲大貓係唔理佢地。宜家四隻中，只係死淨佢同小虎妹兩隻。

佢就比較怕人少少，可能唔算太慣個地方同見到咁多人啦，不過小說妹都叫好照顧佢，所以都放心落嚟。但明顯佢有小小餓親，一則細過小虎妹一個碼，又瘦，所以佢成日係咁食嘢。希望佢快高長大啦。唔記得講，細佬應該係貓女嚟。其實我都未搞清楚佢地兩個啲性別。不過細佬係仔係女都係叫做細佬。係小虎妹如果搞清楚返係仔嚟呢，就改返叫做虎榮，唔係就保持不變。

擒日小虎妹上演一場捕鼠記。事緣小虎妹經常性走埋一堆紙箱果到入面坐，唔知佢做乜，我地又怕佢污糟，所以抱返佢出嚟，但佢又自己又爬返入去。後來為免佢又爬入去，所以決定搬晒啲紙箱，一搬開，原來入面係有一大堆老鼠屎係到！之後我一路搬一路掃，搬到其中一箱，突然一隻老鼠標出嚟，嚇到我呀！小虎妹冇追，但佢就係到周圍聞，似乎係想聞下邊到有老鼠氣味，準備隨時捉佢地。勁！

宜家小虎妹嚟咗我地工廠幾日，已經開始熟習環境，自己周圍走，不過就似乎仲未識得邊到係痾屎。希望佢地快啲學識用沙盤。小虎妹已經唔多驚高喇，夠膽係檯到跳落嚟，又跑得鬼咁快，証明佢應該身體幾健康，好事嚟！宜家係望佢地可以養得大啦，不過明顯我荷包就一定大出血喇。